第一次接受餐廳邀請去試食，「意料之內」有好多觀眾對呢條片有各種疑問😂 其實類似嘅情況，好多Youtuber都遇過、講過、解釋過、鬧過，Youtube 在香港發展多年，每日好多人睇，但原來好多人仍然係完全不明白、不適應、不接受呢種新媒體嘅運作。呢個原因，我相信亦係本港Youtube發展比好多地方緩慢嘅原因。
話說出完呢條片，之後幾日我都訓唔安、食唔落！擔心嘅野實在太多，事實亦證明我擔心係有必要嘅，所有預期會發生嘅事，都發生晒！點打底都冇用😅我覆留言同跟進觀眾嘅意見，包括對餐廳嘅意見（其實唔關我事架，我又唔係喺嗰度做🙄）仲勤力過覆工作上嘅email......
但好開心嘅係，有更多更多我嘅觀眾，表現出對我大力支持同信任，表現出對自媒體營運嘅理解。作為一個小小嘅Youtuber，冇野開心得過知道自己有一班高質嘅觀眾！😘
連日黎，收到好多鼓勵嘅留言、祝福。仲有d觀眾特登喺Facebook PM我，表示種種安慰同支持。你地嘅心意，我真係好感激，多謝嘅說話唔使講太多啦，在心中🙏🏻
Search